Ástæðan er ekki alltaf einföld fyrir því að meiri lykt berst frá klofsvæðinu en konur myndu almennt kjósa. Rétt er þó að taka fram að píkan ætti ekki að lykta eins og rósir en ef lyktin breytist eitthvað gæti eitt af eftirfarandi mögulega útskýrt píkufýluna eins og Prevention tók saman.
Þvagleki
Það er munur á því hvort lyktin sé af einhverju sem er að koma út úr píkunni eða hvort þetta sé lyktin af kynfærunum. Oft getur minni háttar þvagleki verið ástæðan.
Sviti
Það er eðlilegt að svitna í klofinu. Við þessu er gott að nota nærföt úr efnum sem anda betur og skipta strax um nærbuxur eftir æfingu.
Gamall túrtappi
Það kann að hljóma undarlega en læknir vill meina að margar konur gleymi að taka úr sér túrtappa. Á þetta sérstaklega við þegar blæðingar eru að klárast og túrtappinn hefur verið settur upp til vonar og vara.
Bakteríuflóran er í rugli
Algengasta ástæðan fyrir píkufýlu er ójafnvægi í bakteríuflórunni í leggöngunum. Þetta getur gerst hvenær sem er en þó aðallega eftir að konur klára blæðingar og eftir kynlíf þar sem sæði og blóð geta sett allt úr skorðum.