Nokkrar leiðir til að ná sér eftir helgina

Eftir eina vinsælustu ferðahelgi ársins eru landsmenn án efa að velta fyrir sér leiðum til að verða ferskir aftur. Langur tími í bíl, það að sofa í tjaldi og nokkrir drykkir á kvöldin geta myndað bólgur og þrota sem erfitt er að losna við.

Hér eru nokkrar góðar hugmyndir að hafa í huga til að ná upp ferskleikanum aftur.

Baðaðu þig í sjónum

Það kostar ekki krónu að baða sig í Nauthólsvíkinni í sumar. Það að sprikla í sjónum kemur blóðrásinni í gang svo um munar. Eins hreinsar saltið í sjónum líkamann og magnesíum róar. Gott er að fara nokkur skipti í heitan pott og sjóinn á víxl til að ná upp ferskleikanum.

Farðu í langan göngutúr

Þeir sem sátu lengi í bíl eða sváfu úti ættu að fara í langan göngutúr til að mýkja líkamann og koma sér á hreyfingu aftur. Gott er að hafa góða hljóðbók eða að hlusta á spennandi þátt. Fyrr en varir hefur þú gengið af þér slenið og þú finnur mun strax daginn eftir. 

Drekktu nóg af vatni

Eftir nokkra drykki, sér í lagi þegar maður er óvanur að drekka áfengi á líkaminn það til að þurfa meira vatn en vanalega. Ekki drekka mikið meira en 2 lítra á dag. Ef þú ert mjög sólginn í vatn eftir helgina, er ágætt að blanda vatnið söltum sem fást í apótekum víða um landið. 

Borðaðu prótein og ferskt grænmeti

Til að losa líkamann við bólgur eftir helgina ættir þú að borða nóg af agúrkum í bæði hádeginu og á kvöldin þessa vikuna. Hafðu ferska grænmetisskammtinn í það minnsta 300 gr. í kvöld. Hafðu einnig nóg af próteini á diskinum en slepptu kartöflum og sterkju um sinn. Bernais er góð þar sem hún er vanalega sykurlaus. Eitt epli eftir matinn getur haldið blóðsykrinum uppi á milli mála. Þú losnar við nokkur kíló ef þú nærð að halda þig í þessu mataræði næstu dagana. Eins er ofnbakað eða grillað grænmeti æðislegt á þessum árstíma eftir helgina.

Farðu í nudd

Það er ekkert betra en að fara í nudd akkúrat núna. Gott nudd kemur ró á hugann og kemur líkamsstarfseminni í gang aftur. Sogæðanudd á einnig sérlega vel við eftir annasama daga. 

Notaðu ilmkjarnaolíur

Í vinnunni dagana eftir stórar ferðahelgar er gott að vera með ilmkjarnaolíur við höndina. Settu í lófann á þér olíu sem ilmar af piparmyntu eða sítrónu og dragðu inn djúpan anda. Þetta er gott að gera fyrstu klukkustundirnar á hverjum morgni til að ná fókus og áttum aftur.

Farðu í bað á kvöldin

Gott bað með róandi tónlist er nauðsynlegt eftir síðustu helgi. Það kemur huganum inn í líkamann aftur og fær þig til að slaka á fyrir nóttina. Góður nætursvefn og úthvíldur líkami er það sem þú vilt upplifa sem fyrst til að ná upp fyrri orku fyrir lífið, fjölskylduna og vinnuna.

• Blogga um frétt