Fór til Noregs eftir hrun en kennir nú jóga

Bríet er með meistaragráðu í lýðheilsu. Jóga hefur hinsvegar orðið mikilvægur hluti af lífi hennar undanfarin ár. Bríet er margt til lista lagt og brennur fyrir því sem bætir heilsu og eykur lífshamingju fólks.

Forvarnir mikilvægar

Hún starfaði í 10 ár á gjörgæslu í Noregi og Íslandi. „Á gjörgæslu dvelja sjúklingar sem margir hverjir eru með lífið á bláþræði. Það var oft erfitt að sjá ungt og frískt fólk örkumlast eða deyja vegna slysa eða sjúkdóma, sérstaklega þegar maður veit að í mörgum tilfellum hefði verið hægt að koma í veg fyrir áföllin, segir Bríet og heldur áfram. „Þetta starf varð kveikjan að framhaldsnámi mínu í lýðheilsu. Það eru ótal úrræði bæði sem einstaklingar og samfélagið geta nýtt sér til þess að sporna við ótímabærum sjúkdómum og slysum. Sumir eiga auðvelt með að tileinka sér það sem eflir og bætir lífsgæðin á meðan að aðrir þurfa smá hjálp til að halda sér réttu megin við línuna.“

Bríet hefur búið samtals 13 ár í Noregi, en flutti heim haustið 2017. Síðustu árin í Noregi starfaði hún sem „Frisklivskoordinator“ sem mætti þýða sem heilsu- og forvarnafulltrúi.

„Norðmenn eru komnir langt á veg með frábært forvarnastarf sem hefur hjálpað mjög mörgum á vegferð sinni að bættri heilsu,“ segir Bríet. Starfsemin á „Frisklivssentral“ eða Heilsueflingarstöð er mjög margþætt og endurspeglar samfélagið sem nýtir sér aðstöðuna. „Starfsemin spannar allt frá hlaupahópum og námskeiðum um mataræði til svefnnámskeiða.“

Lærði jóga hjá YogaWorks

„Í kjölfar kreppunnar 2009 fluttum við fjölskyldan til Noregs á nýjan leik eftir að hafa búið á Íslandi í 6 ár. Það var fyrir okkur eins og marga aðra erfiður tími sem reyndi mjög á andlegu hliðina. Ég hafði alltaf verið dugleg að hreyfa mig, hljóp mörg hálfmaraþon og styttri hlaup. En það var ekki fyrr en ég byrjaði í jóga að ég áttaði mig á hversu öflug bæði andlegu og líkamlegu áhrifn af jóga væru.

Ég var svo lánsöm að hitta fyrir tilviljun á kennara sem hafði jógakennararéttindi frá YogaWorks, hans tímar voru mun betri en hjá öðrum kennurum að mínu mati og mér leið alltaf vel í líkamanum þegar tímanum lauk. Þegar ég svo ákvað að ná mér í jógakennara-menntun var það bara YogaWorks sem kom til greina.“

Bríet segir jógað hafa alltaf tekið meira og meira pláss í hennar lífi. „Í byrjun ætlaði ég bara að nota kennararéttindin til þess að kenna á „Frisklivssentralen“ en áður en ég vissi af var ég komin af stað með mína eigin litlu jógastöð í Noregi, komin með 500 tíma af kennsluréttindum auk réttinda til að kenna meðgöngujóga. Ég varði meiri og meiri tíma í að kenna jóga, læra jóga og fór á ótal vinnustofur og jóganámskeið. Maður verður aldrei útlærður í jóga, ég verð alltaf nemandi í jóga,“ segir hún.

Jógað gefur mest tilbaka

Bríet hefur ákveðið að setja krafta sína í það sem gefur henni mest til baka í lífinu. Hún samtvinnar þessari vinnu verkefni sem á uppruna í Noregi og tengist hamingju.

Í Noregi fékk Bríet styrk til að koma af stað námskeiði um hamingju. „Hugmyndin kom upp vegna þess að mig langaði að hanna námskeið sem væri upplyftandi og ekki miðað að einhverjum sjúkdómi. Mig langaði að bjóða fólki til þess að vinna með bjargráð í stað þess að tala um vandamálin sem það var að glíma við. Ég nýtti mér verkefni sem er upprunnið í Englandi og kallast „Five ways of wellbeing“ og er byggt á fjölda rannsókna um lífshamingju.

Í sínu allra besta formi

Þetta hamingjunámskeið tók svo stóran vaxtarkipp þegar ég hafði samband við „Rådet for psykisk helse“, samtök í Noregi sem sérhæfa sig í rannsóknum og útgáfu á efni sem tengist andlegri heilsu. Þeim leist vel á Hamingjunámskeiðið sem var í samræmi við önnur verkefni þeirra og vildu setja allt í gang til þess að koma þessu námskeiði til sem flestra í Noregi. Þannig fengum við til liðs við okkur fremstu sérfræðinga á sviði hamingjurannsókna og jákvæðrar sálfræði. Stefnt er að því að hefja formlega hamingjunámskeiðin í byrjun árs 2019.

Hamingjujógað er byggt á þessum námskeiðum þar sem ég flétta inn í jóganámskeiðin því sem sýnt hefur verið fram á að gefi okkur aukna lífshamingju.“

Bríet er 47 ára og í sínu allra besta formi. Hún segir andlegt sem og líkamlegt form sitt í jafnvægi. „Jóga sameinar huga og líkama, þar finn ég róna og hamingjuna. Streita og stanslaus eltingaleikur við ytra umhverfi okkar er lykillinn að ójafnvægi á líkama og sál.“

Svefnnámskeið vinsæl

Námskeiðin sem Bríet heldur eru vinsæl. Hún mun nú bjóða upp á meðgöngujóga, svefnnámskeið sem og hamingjujóga í vetur.

Hvað getur þú sagt mér um svefnnámskeiðið?

„Ég nýti mér reynslu mína af svefnnámskeiðum sem ég hélt í Noregi en bæti við góðum og áhrifaríkum jógastöðum sem þykja góðar fyrir svefninn. Svefnleysi er vandamál fyrir mjög marga en fræðsla og upplýsingar um hvað eykur gæði svefnsins hefur hjálpað mörgum til þess að ná tökum á góðum svefni. Þannig mun ég byggja námskeiðin upp á fræðslu og góðum jógaæfingum sem styðja við góðan svefn. Margir eru stressaðir yfir því að sofa ekki nóg, en það er mjög misjafnt hversu mikinn svefn hver og einn þarf. Af þessum ástæðum notum við sem dæmi svefndagbók til að rýna í svefnmynstur hvers og eins,“ segir hún að lokum.