Hin bandaríska Jess Dukes er dugleg að deila sögu sinni á Instagram og myndum sem sýna árangur hennar. Dukes breytti um lífstíl eftir að hafa þyngst um 34 kíló á innan við tveimur árum, var hún orðin rúm 97 kíló þegar hún breytti til.
Dukes segist hafa þyngst þar sem hún fór mikið út að borða, fékk sér áfengi auk þess sem hún vann við skrifborð og hreyfði sig lítið. Í stað þess að horfast í augu við vandamálið reyndi hún lengi að sannfæra sjálfa sig um að fötin væru að skreppa saman í þurkaranum. Nú nokkrum árum og tveimur börnum seinna er hún komin niður í 63 kíló.
Mataræðið skiptir miklu máli en Dukes segist reyna að borða hreina fæðu. Segist hún ekki telja kaloríur en í morgunmat borðar hún meðal annars kjúklingapylsu og sætar kartöflu. Í hádeginu mikið salat með kjúklingi, ýmiss konar grænmeti, lárperu, hollri salatdressingu og kannski heimatilbúnum sætum frönskum. Í kaffinu fær hún sér þeyting og í kvöldmat er það prótín og mikið grænmeti.
Til að byrja með fór hún í ræktina en seinna meir byrjaði hún að æfa heima hjá sér. Finnst henni gott að þurfa ekki að fara út úr húsi. Hún æfir vanalega sex sinnum í viku en hver æfing tekur ekki nema hálftíma.