Gafst upp á því að æfa í klukkutíma á dag

Mömmubloggarinn Ashley Sneddon gafst upp á því að reyna að æfa í klukkutíma á dag í ræktinni, sex daga vikunnar. Hún komst að því að með tvö lítil börn var raunhæft fyrir hana að æfa í 20 mínútur á dag heima hjá sér og árangurinn lét ekki á sér standa. 

Sneddon birti fyrir- og eftirmynd af sér á Instgram og sagði söguna af því hvernig henni hefði liðið eins og hún væri föst eftir að hún eignaðist barn númer tvö. Var hún full sektarkenndar og sá lítinn árangur en það breyttist þegar hún byrjaði að æfa í bara 20 mínútur í einu. 

Þar sem hún æfir heima hjá sér nýtir hún tímann áður en börnin vakna, meðan þau sofa á daginn eða hreinlega leika sér. Segir hún að með þessu fyrirkomulagi hafi hún bæði tíma fyrir sjálfa sig og sé besta útgáfan af sjálfri sér fyrir börnin sín. 

Tveggja barna móðirin hvetur annað fólk að gera það sem virkar fyrir það. Þetta hafi virkað fyrir hana og líður henni mun betur ekki bara líkamlega heldur andlega en hún þjáðist af fæðingarþunglyndi. 

„Fjórtán mánuðum eftir fæðingu er ég með meira sjálfstraust en nokkurn tímann áður, en það sem skiptir mestu máli er styrkurinn sem ég hef öðlast bæði að innan og utan og hversu vel mér líður í fötunum mínum.“

• Blogga um frétt