Ásdís Rán Gunnarsdóttir, hin eina sanna Ísdrottning, elskar konudaginn sem er á morgun. Hún segist vera gamaldags þegar kemur að samskiptum kynjanna. Hún vill að karlinn borgi brúsann og beri makann á höndum sér.
Hvernig viltu láta tríta þig á konudaginn?
„Ég mundi segja að drottningartrítið væri kaffi og súkkulaði í rúmmið þegar ég vakna og fyrst þetta er sunnudagur þá væri geggjað að fara í góðan brunch með smá kampavíni. Eftir brunsinn væri ég til í eitthvað smá dekur eins og nudd, sem maður tímir ekki að splæsa á sig venjulega og svo væri frábært að fá óvænta gjöf eða glaðning,“ segir Ásdís Rán.
Hún mælir sérstaklega með svörtum rósum sem lifa án vatns í hálft ár og ilma einstaklega vel frá Metanoadelarose sem hún flytur inn sjálf ásamt svörtum demöntum og ilmvatni.
„Svo væri næs að enda daginn á kókó kvöldi heima þar sem karlinn dekrar sérstaklega við mig. Hann gæti boðið upp á fallegan ostabakka, gott rauðvín eða rómantískan kvöldverð með extra kryddi sem endar svo með nautnafullu dekri í svefnherberginu,“ segir hún.
Hvers vegna skiptir konudagurinn máli?
„Mér finnst þetta svo skemmtilegt til að brjóta upp þetta daglega munstur og sýna konunni þinni hvers virði hún er fyrir þér á extra rómatískan hátt. Það er auðvitað alltaf gaman að vera góð við hvort annað en þarna er dagurinn til að fara aðeins yfir strikið í rómatíkinni, koma á óvart, njóta, gleðja, gefa og elska allan daginn nema kannski meðan leikurinn fer fram milli 2 og 4. Mér finnst ekki heillandi að heyra „þetta er bara auglýsinga trikk, ég kem bara á óvart þegar ég vil en læt ekki einhvern dag ráða því blablabla.“ Ég yrði mjög sár ef maðurinn minn myndi ekki gera neitt fyrir mig á konudaginn.“
Ertu gamaldags þegar kemur að samskiptum kynjanna?
„Já já ætli það kallist ekki gamaldags að vilja hafa manninn ráðandi og láta hann borga,“ segir hún og hlær og bætir við: „Ég elska bara svona karlmennsku og herramenn út í gegn - en ég er náttúrulega crazy,“ segir hún og hlær meira.
Nú ert þú á lausu, hvaða væntingar ertu með fyrir konudaginn?
„Úff ég veit ekki hvort ég fái nokkuð þetta árið, en mér finnst rosalega gaman að vera heima eins og á Valentínusardaginn og taka á móti öllum þessum ástföngnu mönnum sem eru að kaupa rósir, gjafir og svarta demanta hjá mér og ég skrifa svo ótrúlega fallegar kveðjur í kortin fyrir þá. Sumir með ljóð aðrir falleg orð um árin saman eða ástarjátningar. Ég set þetta í falleg kort sem ég innsigla svo með vaxi eins og í gamla daga.
Það er svo ótrúlega gefandi að fá að upplifa ástina svona í gegnum aðra og sjá hvað karlmenn geta verið ótrúlega góðir og einlægir við elskurnar sínar. Ég er oft bara með tárin í augunum að skrifa falleg kort,“ segir hún.