Margir sækjast eftir því að vera þokkalega útlítandi í ræktinni og þá koma góð leikfimisföt eins og himnasending. Góð íþróttaföt hafa þó að geyma fleiri kosti en að vera falleg og þægileg. Þau þurfa að vera þannig að manneskjan geti verið frjáls.
Hver hefur ekki lent í því að fara út að hlaupa í íþróttabuxum sem rúllast alltaf niður og í stað þess að öll athyglin sé á hreyfingunni fer meðvitundin í það að hífa upp íþróttabuxur. Ef þú kýst að æfa í buxum og topp skiptir máli að þessar tvær flíkur tali saman svo þú notir ekki orkuna í að toga toppinn niður eða buxurnar upp.
Þess vegna getur verið mjög þægilegt að vera í samfestingi í leikfimi. Í samfestingi þarftu ekkert að hugsa um hvort belgurinn sé að sleppa laus heldur er hann pikkfastur inni í gallanum. Í fyrra kynntist ég íþróttamerki sem heitir Sweaty Betty. Vinkona mín sem býr í Lundúnum dró mig inn í samnefnda verslun og sagði að þarna væru sérlega góðar flíkur sem hentuðu vel til íþróttaiðkunar. Þar féll ég fyrir samfestingi, renndi kortinu í gegn en þegar heim var komið versnaði í því. Ég þorði ekki að klæðast honum því mér fannst ég svo berskjölduð í honum og leið eins og allar fellingar væru í beinni útsendingu.
Eftir nokkra mánuði ákvað ég að sleppa tökunum. Ég hugsaði með mér, ef ég nota hann ekki núna þá er ekki séns að ég verði eitthvað ánægðari með mig í honum eftir 20 ár. Er ekki alltaf verið að hamra á því við mann að lífið sé núna?
Síðan í haust hef ég stundað Infra Power hjá Önnu Eiríksdóttur í Hreyfingu af fullum krafti. Í æfingunum, sem eru mjög krefjandi, hefur samfestingurinn komið að góðum notum. Eftir rosalegar bjölluæfingar koma kannski 20 froskahopp og svo „burpees“, hnébeygjur, armbeygjur og fjallaklifur. Allt þetta er iðkað í 34° heitum sal. Vömbin er því bara kyrr inni í samfestingnum meðan öll þessi ósköp ganga yfir. Einn daginn tók ég svo eftir því að vömbin hafði rýrnað aðeins eftir öll froskahoppin, bjöllurnar og stuðið. Það að keyra upp hámarkspúls tvisvar í viku skilar árangri þótt það sé ekki verið að gera neitt annað með nema kannski slaka á með flothettu og fara út í göngutúra. Það að æfa í hádeginu tvisvar í viku og reyna svona mikið á sig hefur þó einn ókost. Húðliturinn breytist úr ljósum í dökkrauðan og stundum jafnar húðliturinn sig ekki fyrr en um kaffileytið. Hégóminn þarf því að víkja fyrir heilsunni.