Leik- og tónlistarkonan Olivia Newton-John segir að brjóstakrabbamein hennar hafi ekki sést í fyrsta skipti sem hún fór í skimun. Hún hafi hins vegar fundið að eitthvað væri að og beðið um ítarlegri rannsóknir.
Newton-John ræddi um krabbameinið í sérstöku viðtali þar sem hún kynnti stofnun sína, Olivia Newton-John Foundation, sem vinnur að því að finna lækningu gegn krabbameini. Sjálf greindist hún með brjóstakrabbamein árið 1992.
„Ég vissi strax að það væri eitthvað að. Ég fór myndatöku og hún var jákvæð. Síðan fór ég í ástungu og hún var jákvæð. Ég er ekki að segja þetta til að hræða konur heldur til þess að hvetja þær til þess að treysta eigin innsæi,“ sagði Newton-John.
„Ég fann að það var eitthvað að, og þegar ég var með skurðlækninum mínum ákváðum við að taka vefjasýni,“ sagði Newton-John og þá kom í ljós að hún væri með krabbamein í hægra brjósti.
Hún fór í brjóstnám og níu mánaða lyfjameðferð.
Krabbameinið hvarf eftir meðferðina en lét aftur á sér kræla árið 2013 en þá hafði það dreift sér út fyrir brjóstvefinn. Árið 2017 komst hún að því að hún væri komin með krabbamein á fjórða stigi og að það væri komið í hrygginn.