Þyri Huld Árnadóttir dansari leggur áherslu á að borða lifandi fæði, mat sem gerir meltingunni gott. Það kemur ekki í veg fyrir að hún borði sætindi en henni finnst fátt skemmtilegra en að útbúa náttúrulega sætt konfekt heima hjá sér. 

Þyri gerði tvær konfektgerðir fyrir jólablað Morgunblaðsins sem kom út 26. nóvember. 

Konfektmolagerð er hluti af aðventuhefðum Þyri, sem segist vera mikið jólabarn og finnst allt miklu skemmtilegra þegar jólaljós og kerti lýsa upp myrkrið.

„Ég geri allt kósí heima á aðventunni, geri alls konar konfektmola og hitti vinkonur. Við skellum í nokkra mola, spjöllum og höfum gaman. Ég hitti fólkið mitt og nýt þess að vera með fjölskyldunni í aðventunni,“ segir Þyri um aðventuna.

Þyrí Huld Árnadóttir með jólanammi Árni Sæberg

Borðar mikið af súrkáli um jólin

Þyri er vegan og stór hluti af hennar fæðu er hráfæði. Hún borðar venjulega meira af heitum mat í skammdeginu en krydd eins og kanill, kardimommur, túrmerik og engifer fær gott pláss í eldhúsinu hennar í skammdeginu.

„Ég hef aldrei verið mikið fyrir jólamat en ég og maðurinn minn prufum alltaf eitthvað nýtt á jólunum, gerum sýrt grænmeti og alls konar skemmtilegt. Það er líka nauðsynlegt að borða mikið af súrkáli um jólin þannig að líkaminn eigi auðveldara með að melta allt þetta góðgæti.

Ég borða lifandi fæði sem snýst um að fylla líkamann af ensímum til að meltingin sé alltaf í góðu standi. Ég borða alltaf spírur, hveitigras, rejuvelak-drykk og súrkál með í jólastuðinu í bland við alls konar vegannammi og veganmat. Það er alltaf pláss fyrir sætindi á jólunum en ég geri það mestmegnis sjálf, finnst það langbest.“

Molarnir hennar Þyri eru ekki bara náttúrulega sætir þar sem jólaskrautið er líka náttúrulegt.

„Ég er alin upp við að allt sé skreytt með náttúrulegum efnum. Jólatré með lifandi kertum og könglum. Ég fer út í garð hjá mömmu og pabba og klippi greinar með berjum og alls konar til að skreyta. Ég skreyti ekki mikið en er alltaf með krans frá mömmu úr greni og berjum, kaupi kerti með góðum jólailmi, greni, kanil og negul,“ segir Þyri. Náttúruleg jólalykt eins og mandarínu- og grenilyktin kemur Þyri alltaf í jólaskap sem og ilmurinn af rauðkálinu í eldhúsi foreldra hennar.

Skjáskot/instagram

Karamellan gerir allt betra

Hvað verður í matinn á jólunum?

„Ég er ekki búin að ákveða hvað verður í jólamatinn. Ég og Hrafnkell maðurinn minn vorum að velta því fyrir okkur að vera með tapasjól. Við elskum smárétti og að nostra við hvern og einn rétt þannig að það er spurning hvort það verða ekki bara vegan-tapasjól í ár,“ segir Þyri.

„Jólamolarnir mínir eru náttúrulega sætir með döðlum. Ég nota carob í staðinn fyrir kakó, carob er náttúrulega sætt og inniheldur ekki koffín. Ég set alltaf allar hnetur og fræ í bleyti til að þær verði auðmeltanlegri. Ég elska að föndra og konfektgerð er í miklu uppáhaldi. Þetta eru mínir klassísku molar. Ég geymi þá í frystinum og næli mér svo alltaf í einn og einn,“ segir Þyri og bætir við að molarnir séu fljótir að klárast.

Þyri notar sömu karamelluna sem fyllingu í súkkulaðimolana sem hún gerði fyrir jólablað Morgunblaðsins og til þess að búa til pekanhnetukaramellu. Hún segir reyndar þessa karamellu vera í miklu uppáhaldi á sínu heimili og fjölskyldan fái sér hana út á jógúrt- og bananaís. „Hún gerir allt betra,“ segir Þyri.

Tengdar fréttir

Jóla jóla ...

Nína Dögg og Gísli Örn héldu upp á jólin í Perú

• Svona skreyta frændurnir í Húsasmiðjunni jólatréð
• 5 myndir sem þú verður að sjá um jólin
• Heldur sín fyrstu jól heima á ADHD-lyfjum
• Fallegar neglur eru skvísubúst um jólin

» Fleiri tengdar fréttir