Ágústa Johnson: Tvennt til að hafa í huga

Áskorunin er helst sú að við viljum að hlutirnir gerist hratt og áreynslulaust en úthald og þolinmæði þarf til að halda út breytingar á lífsstíl sem eru utan þægindaramma okkar. Agi og staðfesta þurfa að vera fyrir hendi svo halda megi út til lengri tíma og koma upp nýjum venjum.

Jafnvægi er lykilþátturinn 

Hvernig komum við okkur af sjálfstýringunni og hefjum markvisst að einbeita okkur að líðan okkar, heilsunni og láta ljós okkar skína?  

Eflum okkur innan sem utan með því að gefa gaum að því sem virkjar orkuna innra með okkur svo að eldmóðurinn og krafturinn verður óstöðvandi. Hljómar vel ekki satt?

Fyrsta skrefið er að tileinka sér betri næringu, gæðasvefn og stunda reglulega hreyfingu. Það er nokkuð öruggt að þannig virkjarðu kraftinn innra með þér. Til að hefja slíka vegferð (ef þú ert ekki nú þegar á þeirri leið) eru hér þrautreynd og góð ráð. 

Skipuleggðu eina breytingu á viku næstu átta vikurnar.

Hafðu tvennt í huga allan tímann:   

1. Það getur enginn gert þetta fyrir þig, árangurinn stendur og fellur með þér.

2. Hve mikið langar þig að bæta lífsstílinn þinn og heilsu? Spurðu þig þessarar spurningar oft á dag. Til dæmis þegar þig langar að sleppa ræktinni og þegar þú stendur frammi fyrir þeim óteljandi ákvörðunum sem hver dagur hefur í för með sér: Velja hollu fæðuna eða láta eftir sér ruslfæðið? Standa upp eða sitja áfram? Veldu það rétta fyrir þig sem kemur þér stöðugt nær markmiðum þínum.  

Eftirfarandi eru 20 tillögur að vikulegum breytingum. Veldu hvað hentar þér best og stefndu að því að festa breytinguna varanlega í sessi í þínum lífsstíl, en taktu bara einn dag í einu.

Hér er aðeins um að ræða hugmyndir, þú getur gert þinn eigin lista eða prófað hluta af þessum eða allar. Hafðu í huga að þetta er allt undir þér komið. Allt hefur áhrif, einkum við sjálf!

1. Minnkaðu sykurneyslu um helming. 

2. Settu þér þá reglu að drekka ekki sykraða drykki.

3. Hafðu annan hvern dag sykurlausan.

4. Farðu að sofa kl. 11. 

5. Skipuleggðu 10 mínútur á dag til að hugleiða hvað skiptir þig máli í lífinu.

6. Hafðu æfingatöskuna tilbúna að kvöldi. 

7. Skipuleggðu 3x30 mín. æfingar á viku og veldu það sem líklegt er að þú hafir gaman af.

8. Leitaðu til fagaðila í þjálfun ef þú veist af reynslunni að þú þarft á því að halda til að fá aðhald og fræðslu.

9. Hafðu sem reglu að taka aldrei lyftu, alltaf stigana.

10. Farðu í 20 mínútur göngutúr á hverjum degi.

11. Minnkaðu alla matarskammta þína um 25%.

12. Fastaðu í 12 tíma frá kvöldverði og til næsta morguns.

13. Borðaðu tvær máltíðir á dag og aðeins vatn, kaffi eða te þess á milli.

14. Prófaðu eina nýja tegund grænmetis.

15. Prófaðu nýja tegund þjálfunar.

16. Settu app í símann þinn sem minnir þig á að sitja ekki lengur en 30 mínútur í einu.

17. Finndu þér lesefni og hlaðvörp sem hvetja þig áfram til heilbrigðara lífernis.

18. Hættu að nota tóbak.

19. Minnkaðu áfengisneyslu um helming.

20. Byrjaðu daginn á fimm mínútna jafnvægisæfingum. 

Byrjaðu núna, það er ekki eftir neinu að bíða, tækifærin eru þín.