Leikkonan Blythe Danner opnaði sig nýverið um baráttu sína við krabbamein í munni, sama krabbamein og leiddi eiginmann hennar, leikstjórann Bruce Paltrow, til dauða árið 2002. Danner og Paltrow voru gift í 32 ár og eiga saman tvö börn, leikkonuna og athafnakonuna Gwyneth Paltrow og kvikmyndaframleiðandann Jake Paltrow.
„Krabbamein snertir alla á einhvern hátt, en það er óvenjulegt að hjón fái sama krabbamein,“ sagði Danner í samtali við People. Hún var stödd í London árið 2018 þegar hún fann fyrir „klumpi“ í hálsinum sem reyndist vera æxli.
„Mér byrjaði að svima og ég var farin að gleyma öllu. Og svo fann ég fyrir klumpi í hálsinum, rétt við hliðina á þeim stað sem Bruce hafði fundið sinn árið 1999,“ sagði leikkonan.
„Ég man að ég leit upp til himins og sagði við Bruce: „Ertu einmana þarna uppi?“. Þetta er lúmskur sjúkdómur, en ég hef það gott núna og er heppin að vera á lífi,“ bætti hún við.
Leikkonan hefur nú farið í þrjár skurðaðgerðir ásamt öðrum meðferðum og er nú í bataferli, en hún fékk þær frábæru upplýsingar árið 2020 að hún væri laus við krabbameinið. Nú vinnur hún með Oral Cancer Foundation til að vekja athygli á krabbameini í munni.