Ástralska sjónvarpskonan Bindi Irwin opnaði sig nýverið um að hafa gengist undir aðgerð eftir að hafa greinst með endómetríósu. Irwin er dóttir dýralífssjónvarpsstjörnunnar Steve Irwin sem lést árið 2006.
Eftir að hafa flakkað á milli lækna í 10 ár fékk Irwin loksins greiningu. Endómetríósa er krónískur, fjölkerfa og fjölgena sjúkdómur sem getur valdið miklum sársauka og haft áhrif á frjósemi.
„Í 10 ár hef ég glímt við óyfirstíganlega þreytu, verki og ógleði. Að reyna að vera jákvæð manneskja og fela sársaukann hefur reynst mjög strembið. Þessi síðustu 10 ár hafa innihaldið ótal prófanir, læknisheimsóknir, skanna o.s.frv.,“ skrifaði Irwin í færslu á Instagram-reikningi sínum.
Irwin bætti við að á ákveðnum tímapunkti hafi læknar sagt henni að vandamál hennar væru einfaldlega eitthvað sem hún þyrfti að bara „að takast á við“ sem kona.
„Ég gafst algjörlega upp og reyndi að þrauka í gegnum sársaukann. Ég fékk engin svör fyrr en vinur minn, Leslie Mosier, hjálpaði mér að komast á rétta leið til að endurheimta líf mitt. Ég ákvað að fara í aðgerð vegna endómetríósu,“ skrifaði Irwin.
Irwin segir læknana hafa fundið 37 vefjaskemmdir (e. lesions), og hafi sumar þeirra verið djúpar og reynst erfitt að fjarlægja þær. Þá hafi einnig fundist blöðrur. Hún vonast til þess að saga hennar geti hjálpað öðrum konum sem þurfa á hjálp að halda.