Í einu af úthverfum Reykjavíkur hefur íslensk fjölskylda komið sér fyrir í 500 fermetra húsi. Húsið var byggt á árunum 2007 og 2008.
Sérstaklega var vandað til verka. Innanhúsarkitektinn Hallgrímur Friðgeirsson hannaði húsið að innan en húsið sjálft var hannað af Krark ehf. Ekki hægt að segja annað en það hafi heppnast vel.
Hnotuparket og kalksteinn spila fallega saman á móti innréttingum sem eru bæði sprautulakkaðar hvítar og úr dökkri bæsaðri eik. Í húsinu var lagt mikil áhersla á góða hljóðvist og fallega lýsingu, hátt er til lofts og vítt til veggja.
Húsið er á tveimur hæðum. Á efri hæðinni er eldhús, stofa, inngangur, vinnuherbergi og sjónvarpsherbergi. Á neðri hæðinni er hjónaherbergi með stóru fataherbergi og baðherbergi ásamt líkamsræktarherbergi. Í hinum enda neðri hæðarinnar er bílskúr, barnaherbergi, baðherbergi barnanna og stórt herbergi með sér baðherbergi og lítilli eldhússinnréttingu.
Eldhúsið flæðir inn í borðstofuna en veggur með arin skilur að stofu og borðstofu. Eldhúsinnréttingin var teiknuð af Hallgrími Friðgeirssyni ásamt öðrum innréttingum í húsinu. Innréttingarnar voru smíðaðar hjá TH innréttingum.