Ef þig hefur dreymt um að eiga litaglatt heimili en ekki þorað að láta vaða skaltu skoða þessar myndir. Í íbúðinni eru margar sniðugar hugmyndir, sumar kosta ákaflega lítið og aðrar eru kannski örlítið kostnaðarsamari. Það kostar til dæmis lítið að lakka heilan vegg túrkislitaðan, setja á hann hillur í sama lit og mála gamla píanóið. Það kostar heldur ekki mikla peninga að láta veggfóðra einn og einn vegg eða jafnvel eitt herbergi.

Í þessari íbúð, sem hönnuð var af Incorporated Architecture & Design, sést vel hvernig hægt er að leika sér með efniviðinn og hreinlega láta vaða. Ljósin fyrir ofan borðstofuborðið eru að öllum líkindum úr IKEA og kosta ekki mikið. Þegar búið er að sprauta þau í þessum fagurrauða lit lifna þau algerlega við og verða ómótstæðileg.

Margliti sófinn frá Roche Bobois er reyndar rándýr. Undirrituð veit allt um það því í góðærinu pantaði hún bæklinginn beint frá París. Bara bæklingurinn með sendingarkostnaði kostaði formúu. Það er samt engu um það logið að þessi sófi gerir rýmið undirsamlegt og hann er nákvæmlega jafnflottur í dag og árið 2006. Það er einmitt það sem einkennir góða hönnun.