Hún vildi fá rými sem virkaði vel fyrir þær mæðgur, en þær eru mikið á ferð og flugi og eru bæði í hundunum og hestunum,“ segir Sesselja.

Sesselja segir að henni hafi verið treyst 100% fyrir verkefninu og var húsráðandi opin fyrir flest öllu sem Sesselja lagði til.

„Hún flutti í þetta hús eftir að hafa búið í Sigvaldahúsi í Reykjavík mjög lengi. Hún vildi fara frá því þunga útliti sem fylgdi því húsi í eitthvað nútímalegra en þó halda ákveðnum Sigvalda-anda. Því var alveg ljóst að vísanir í Sigvaldalitina, bláan, gráan og gulan, yrðu grunnurinn, en ofan á það yrði lagt nútímaútlit með mjög góðu geymsluplássi. Eina séróskin hennar var í raun bara tvöfaldur ísskápur,“ segir Sesselja.

Þegar húsráðandi keypti húsið var hvít sprautulökkuð höldulaus innrétting í húsinu. Sesselja lagði til að þær myndu fara í róttækar breytingar á innréttingunni.

„Þegar ég var búin að skissa upp innréttinguna og kom með þá djörfu hugmynd að fletta inn í hana geómetrísk form og láta sprauta hana í MR. FIX-litnum úr litakortinu mínu var upphafspunkturinn fundinn. Allt annað fylgdi í kjölfarið,“ segir Sesselja og er þá að vísa í litakort Slippfélagsins, en öll málning í húsinu kemur þaðan.

„Við rifum niður eyjuna en endurbyggðum hana í öðru formi á sama stað. Í hana var bætt við fataskáp, sem og stórum búrskáp og háum grunnum glasaskáp. Allt var þetta að sjálfsögðu staðsett þannig að verklínurnar í eldhúsinu væru sem stystar.“

Á þessum tímapunkti þurfti að huga að stigahandriðinu.

„Ég vildi fá gróflegt efni sem myndi virka frekar sem skilrúm en handrið með vísun í form frá Sigvaldatímanum. Þar sem svo gróft efni var notað var mikilvægt fyrir mig að járnið væri létt ásýndar og engar væru sjáanlegar festingar. Ég létti enn frekar ásýndina með því að hafa mismunandi þykkt og breidd á stöngunum. Hann Þór í Suðulist sá um verkið og gerði það mjög vel en ég viðurkenni að hann lyfti aðeins augabrúnunum í áttina til mín þegar ég var í ham að útskýra hvað ég vildi fá. Ég valdi síðan fallegt mjúkt stigateppi til að vega á móti kalda efninu í handriðinu,“ segir hún. Þegar Sesselja hóf verkefnið vissi hún hvaða húsgögn voru til á heimilinu og gætti þess vel að þau pössuðu vel við breytingarnar á húsnæðinu.

„Í raun fór þetta verkefni mjög vel fram, þó að einhverjar hindranir væru í þróun formsins í innréttingunni, því allt þurfti þetta að passa, stærð innréttinga, formin sem og innfelldu höldurnar en það leystist auðvitað á endanum. Ég réði líka góðan verkefnastjóra, hann Haffa hjá HH Trésmiðju, sem er óskaplega mikilvægt í verkefni sem þessi. Ég hef alltaf lagt áherslu á að hafa gott fólk í kringum mig, Fix-teymið og þá bæði á skrifstofunni minni sem og á verkstað. Án Fix-teymisins værum við ekki búin að stækka í þetta flotta batterí sem við erum á leiðinni að verða.“

Sesselja er önnum kafin, en hún er að vinna nokkur stór verkefni. Til dæmis fyrir Rekstrarvörur og Veitur, þar sem hún er að teikna skrifstofur og vinnurými fyrir bæði fyrirtækin.

„Ég er einnig með tvö hús í gangi þar sem heildarhönnun er í gangi – sem svipar kannski dálitið til þessa ævintýraverkefnis á Álftanesi. Svo eru nokkur eldhúsverkefni og baðherbergi einnig í gangi. Svo mætti ég nú ekki gleyma að nefna að ég er einnig að sjá um heildarútlit og fagstjórn yfir stóru heimilissýningunni Amazing Home Show, sem er núna í enda maí ásamt Vista Expo. Það er líka mjög spennandi verkefni og þar á meðal er ég að aðstoða söngfuglana Frikka Dór og Þórunni Antoníu að hanna sitt draumaherbergi á sýningunni. Mjög mikið stuð þar,“ segir hún.