Björgvin Guðmundsson, fyrrverandi ritstjóri Viðskiptablaðsins og einn af eigendum KOM, festi kaup á glæsilegri hæð í Vesturbænum. Með kaupunum varð hann nágranni Kristínar Þorsteinsdóttur og Skapta Jónssonar. Íbúðin stendur við Ásvallagötu 26 í Reykjavík en hún er vönduð og glæsileg. Fiskibeinaparket prýðir stofu og borðstofu og í eldhúsinu er hvít sprautulökkuð innrétting og eyja eins og er svo móðins núna. Vatnsblátt gler setur svip sinn á eldhúsið.
Smartland fjallaði um íbúðina í maí á þessu ári en Björgvin festi kaup á íbúðinni í júlí. Íbúðin er 148 fm að stærð en húsið sjálft var byggt 1949. Húsið er á fjórum hæðum, kjallari, hæð, efri hæð og ris.
Björgvin býr á hæðinni en fyrir ofan hann búa Kristín, ritstjóri Fréttablaðsins, og eiginmaður hennar, Skapti Jónsson.