Langar þig að gista í húsi látins hönnuðar?

Gianni Versace, stofnandi Versace-tískuhússins, keypti Villa Casa Casuarina á Flórída árið 1992 og var myrtur á tröppum villunnar árið 1997. Húsið hefur að mörgu leyti haldist eins þrátt fyrir mikið af eigum hans hafi verið selt. 

Nú er hægt að gista í þessu sögufræga húsi og anda að sér anda Versaces. Systir Giannis og arftaki, Donatella Versace, gisti til að mynda oft í húsinu í herbergi sem kallað er Signature Suite á meðan bróðir þeirra Santo gisti í herbergi sem kallað er Venusarherbergið. 

Fagurlega skreyttir veggir og loft einkenna glæsilegt húsið en loft, veggir, gólf og gluggar eru frá tíð Giannis Versaces. Nýjasta þáttröðin af American Crime Story fjallar um morðið á Versace og er að hluta tekin upp í Villa Casa Casuarina.