Gáfu gömlu eldhúsinnréttingunni nýtt líf

Á dögunum breyttu þau Þórunn Stella Hermannsdóttir og Davíð Finnbogason eldhúsinu sínu í Kópavoginum en þau máluðu meðal annars myntugræna eldhússkápana hvíta á lit. Þórunn Stella myndaði ferlið frá a til ö og setti saman í myndband í lokin. 

Áður en þau hófust handa var Þórunn Stella smeyk við að eyðileggja vandaða eldhúsinnréttinguna. Áhyggjurnar voru þó óþarfar eins og sést á myndunum og í dag sér Þórunn helst eftir því að hafa ekki gert þetta fyrr. 

Ef skrefum Þórunnar Stellu er fylgt ættu flestir þeir sem búa yfir smá þolinmæði að geta frískað upp á eldhúsið hjá sér. Eins og sést á fyrir- og eftirmyndunum er mun léttara yfir eldhúsinu og spilar það inn í að þau máluðu ekki bara eldhúsinnréttinguna heldur flísarnar á milli efri og neðri skápanna líka. 

Létt er yfir eldhúsinu eftir breytingarnar. Ljósmynd/Aðsend

Fyrir breytingarnar voru grænar skáphurðir og gular flísar í eldhúsinu. Ljósmynd/Aðsend

Hér má finna upplýsingar um hvernig best er að fara að þegar innrétting og flísar er málað. Einnig má sjá myndband af öllu ferlinu neðst í fréttinni. 

Að mála innréttingu:

1. Þrífa með volgu vatni og sápu.
2. Þrífa með hreinsiefni til að ná allri fitu og óhreinindum af en efni geta flagnað af ef fita er á innréttingunni.
3. Pússa yfir fleti með sandpappír númer 180 sem á að grunna og lakka.
4. Strjúka yfir með rakri tusku (taka rykið) eða með hreinsiefninu í tusku.
5. Leggja á undirlag með upphækkun.
6. Grunna innréttinguna. Gefið grunninum sex til átta klukkustundir til að þorna áður en snúið er við og hin hliðin grunnuð.
7. Pússa létt yfir grunninn þegar hann hefur þornað með sandpappír númer 240.
8. Strjúka yfir með rakri tusku (taka rykið) eða með hreinsiefninu í tusku.
9. Lakka yfir eina umferð. Lakkið þarf að þorna í sex til átta klukkustundir.
10. Síðan er slípað mjög létt yfir með sandpappír 320 (mjög fínn pappír).
11. Rykið tekið með rökum klút eða rykklút.
12. Önnur umferð lökkuð yfir.
13. Athugið að lakkið getur verið sjö til tíu daga að fullharðna en hægt er að setja innréttinguna upp varlega. Varist hins vegar mikið hnjask í þennan tíma eða þrif. Akrýllakk er plastefni sem þarf tíma til að ná fullri hörku.
14. Mikilvægt að nota lakkrúllu (snögghærð) og lakkpensil svo áferðin verði sem best.

Að mála flísar:

1. Þrífa með hreinsiefni til að ná allri fitu og óhreinindum af.
2. Grunna með en grunnurinn þarf að þorna í sex til átta klukkustundir. 
3. Lakka tvær umferðir. Lakkið þarf að þorna í sex til átta klukkustundir á milli umferða. 

• Blogga um frétt