Samkvæmt Fresh Homes hafa litir sérstök áhrif á okkur mannfólkið. Þessi sálfræðilegu áhrif lita eru talin vera almenn, en gott er að prófa sig áfram með liti og áhrif þeirra á fjölskylduna. Til myndskreytinga með greininni eru notaðar myndir frá breska fyrirtækinu Farrow & Ball þar sem starfsmenn eru góðir í fagurfræði og samspili lita og forma.
Rauður
Rauður litur færir orkuna í herbergjum upp. Þessi litur, meira en annar, eykur flæði adrenalíns í líkamanum. Þess vegna er gott ráð að velja rauðan lit ef þú vilt efla flæði og poppa upp stemninguna í herbergjum þar sem fólk kemur saman og vill eiga góðar stundir. Sem dæmi í borðstofu eða stofu. Rauður litur hefur áhrif á blóðþrýsting og eykur hjartslátt. Vanalega velur fólk sér ekki rauðan lit inn í svefnherbergi þar sem liturinn þykir of orkumikill þar. En ef þú ert vanalega í herberginu eftir að það er orðið dimmt getur rauður litur inn í svefnherbergi verið ríkulegur og smart.
Gulur
Gulur er litur sólarinnar og hamingjunnar. Gulur er litur eldhússins, borðstofunnar og er góður á baðherbergið. Gulur gefur þar orku og reisir andann. Gulur er frábær litur fyrir ganga, lítil svæði og hol, hann er ríkulegur og býður mann velkominn.
Gulur er góður með öðrum litum en ætti ekki að fara á of mörg svæði. Rannsóknir sýna að fólk hefur meiri tilhneigingu til að missa stjórn á skapinu í gulu umhverfi. Börn virðast gráta meira í gulum herbergjum. Fólk getur fundið tilfinningar sínar koma upp í gulu umhverfi.
Blár
Blár er sagður lækka blóðþrýsting og hægja á hjartslætti. Þess vegna er hann talinn róa og oft talinn henta vel í herbergjum og baðherbergjum.
Pastelblár er ekki talinn góður á veggi, hann er talinn kuldalegur. Hins vegar getur sá litur hentað vel í herbergi sem er ekki með miklu sólarljósi. Ef þú velur ljósbláan í herbergið, er gott að jafna hann út með hlýjum bláum tónum í innanstokksmunum og teppi.
Ef þú vilt búa til róandi stemningu á stöðum þar sem fólk kemur saman er lagt til að við notum hlýjan bláan lit. Dökkblár hefur hins vegar þau áhrif að hann getur ýft upp sorg og sterkar tilfinningar.
Grænn
Grænn litur þykir koma ró á hugann. Af þeim sökum passar grænn inn í hvaða herbergi sem er í húsinu. Ef þú velur þér grænan inn í eldhúsið, inn í borðstofuna eða stofuna ertu að búa til umhverfi til þess að róa fólk niður og tengja.
Grænn er talinn minnka streitu og hjálpa fólki við að slaka á. Eins er talið að grænn auki frjósemina, sem gerir litinn tilvalinn fyrir sum svefnherbergi.
Appelsínugulur
Er frábær til að koma orkunni upp. Þess vegna er ekki mælt með þessum lit í svefnherbergið, heldur frekar á þá staði þar sem þú ert að stunda líkamsrækt og vilt koma blóðrásinni af stað.
Í fornum egypskum fræðum var talið að appelsínugulur litur hefði góð áhrif á lungun.
Hlutlausir litir
Grár, svartur, hvítur og brúnn eru litir sem kallast hlutlausir litir. Þeir eru algengir á heimilum fólks og koma reglulega í tísku. Vinsældir þessa lita má rekja til þess að þeir eru sveigjanlegir. Ef þú bætir litum inn í hlutlaust umhverfið þá getur þú fært orkuna upp, en ef þú tekur þá út úr umhverfinu þá hefur það róandi áhrif.
Mælt er með því að nota svartan lit í takmörkuðu magni, einungis til að draga fram ákveðin svæði. Í raun eru margir sérfræðingar á því að svartur sé nauðsynlegur á öll svæði til að búa til dýpt og tengja aðra liti saman.
Litir í loftum
Loft í húsum eru 1/6 hluti af rýminu. Flest loft fá hvítan eða ljósan lit. Hins vegar eru sumir duglegir að velja liti í loftin. Ljós loft láta lofthæð húsnæðis virka meiri. Dekkri litir láta lofthæðina virka minni. Gott er að skoða hvað er í boði og hvaða áhrif litir hafa á loft í húsnæði. Að vinna rannsóknarvinnu þegar kemur að litavali skiptir miklu máli til að hver og einn geti fundið það sem hentar fjölskyldunni best.