Stjörnurnar láta enga kofa duga þegar þær fara í sumarfrí eins og sést á húsinu sem tónlistarfólkið Beyoncé og Jay-Z tóku á leigu sumarið 2012. Húsið er nú komið á sölu og kostar hvorki meira né minna en tæpar 50 milljónir dollara eða rúma fimm milljárða.
New York Post greinir frá því að hjónin hafi borgað 400.000 dollara fyrir mánuð í húsinu þegar þau dvöldu þar eða rúmar 42 milljónir. Húsið er staðsett í Hamptons en ofurhjónin fjárfestu sjálf í húsi á svæðinu í fyrra.
Það fór líklega ekki illa fyrir þeim Beyoncé og Jay-Z þegar þau dvöldu í húsinu enda ekki aðeins dýrt heldur líka flott. Í húsinu er meðal annars að finna tíu svefnherbergi og 17 baðherbergi, sundlaugar, líkamsrækt, spa, bíósal, hjólabrettapall og keiluhöll.