Kalkmálning frá íslenska merkinu Kalklitir verður fáanleg í H&M Home Concept-verslunum í Evrópu í haust. Alls munu níu búðir opna í fimm löndum.
Sex litir verða fáanlegir frá merkinu en þetta er í fyrsta skipti sem H&M Home selur annað merki en sitt eigið í verslunum sínum. Fyrsta verslunin opnaði á dögunum í Biblioteksgatan 11 í Stokkhólmi í Svíþjóð.
Þá munu concept-verslanir einnig opna í Hamborg og München í Þýskalandi, Kaupmannahöfn í Danmörku, Ósló í Noregi og Malmö í Svíþjóð.
Kalklitir er íslenskt fjölskyldufyrirtæki sem var stofnað á Akureyri. Framkvæmdastjóri og stofnandi fyrirtækisins er Auður Skúladóttir og segir á síðu fyrirtækisins að það byggi á hæfileikum og menntun hennar. Kalkmálningin frá Kalklitum er náttúruvæn og er seld í duftformi, sem gerir hana umhverfisvænni.
Þau hafa fært framleiðsluna til Svíþjóðar og eru með skrifstofur í Belgíu. Kalklitir eru einnig fáanlegir í fleiri verslunum víða um Evrópu og halda þau einnig úti vefverslun.