Bloggari kaupir 100 milljóna fasteign

Bloggarinn og áhrifavaldurinn Sólrún Diego og unnusti hennar, Frans Veigar Garðarsson, festu kaup á 318 fm einbýlishúsi í Mosfellsbæ 9. september. Húsið er glæsilegt á velli en það var áður í eigu Róberts Melax og Áslaugar Jónsdóttur. 

Sólrún og Frans leigðu íbúð í Kópavogi áður og greindi Smartland frá því að umrædd íbúð væri án efa best þrifna íbúð landsins. 

Um þessar mundir eru Sólrún og Frans í miklum framkvæmdum í húsinu en fylgjendur samfélagsmiðlastjörnunnar geta fylgst með í beinni. 

Það sem vekur athygli er kannski að fasteignamat hússins verður 108.400.000 kr. 2019. Það er hraustlegt. Þetta er reyndar ekki þeirra fyrsta eign heldur eign númer tvö. 

Fylgjendur Sólrúnar á Snapchat hafa rekið augun í að Sólrún er sparsöm og tókst henni að eyða mun minni peningum í mat en okkur hinum. 

Ef parið færi út í að bjóða upp á námskeið í sparnaði gætu þau örugglega fyllt nokkrar Laugardalshallir.