Dagný Skúladóttir, ferðaráðgjafi og flugfreyja, rekur netverslunina Reykjavikbutik ásamt systur sinni. Hún á von á sínu fjórða barni og er dugleg að sinna áhugamálum sínum sem tengjast hönnun.
Hvað getur þú sagt mér um Reykjavikbutik?
„Ég og tvíburasystir mín Drífa Skúladóttir opnuðum netverslunina Reykjavikbutik.is um miðjan október 2014 og fögnum við því fjögurra ára afmæli núna í næsta mánuði. Reykjavikbutik selur hönnunarvörur fyrir heimilið auk þess sem við bjóðum upp á fallega hluti í barnaherbergið. Myndirnar hjá okkur hafa verið hvað vinsælastar. En við seljum falleg veggspjöld frá þekktum ljósmyndara sem heitir Vee Speers, auk mynda frá Love Warriors og Ruben Ireland.“
Dagný segir að það sé áhugamál að fylgjast með helstu straumum og stefnum í hönnun. Þær systur séu að auka vöruúrval fyrir börnin og það séu spennandi tímar framundan.
„Netverslanir voru frekar nýtt fyrirbæri hér á landi fyrir rúmum fjórum árum og það er gaman að sjá hvað margar netverslanir eru komnar á markaðinn og eins að sjá verslun eins og Snúruna fara úr því að vera netverslun í það að opna glæsilega búð.“
Dagný og fjölskylda hennar búa í fallegu húsnæði í Akrahverfinu í Garðabæ. Aðspurð hvað einkennir falleg heimili segir hún að fólkið skipti miklu máli og persónulegur stíll þeirra sem búa á heimilinu.
Hver er uppáhaldshluturinn heima?
„Panton-lampinn minn hvíti er alltaf í uppáhaldi.“
Hvað keyptir þú þér síðast? „Gráan bekk frá Modern.“
Hefurðu alltaf haft áhuga á heimili og hönnun?
„Nei, ég hugsa að það hafi komið með tímanum. En ég hef alltaf haft gaman af að skoða heimili annarra og spá í þau.“
Dagný er ein af þessum ofurduglegu konum og segist vera lítið fyrir að kjarna sig heima fyrir. „En ef mér dettur í hug að slaka á þá er það uppi í rúmi.“
Ertu mikið fyrir að breyta heimilinu?
„Já, ég var mikið fyrir að breyta. Hér áður varð ég fljótt leið á hlutunum en núna með tímanum hef ég aðeins róast. Ég er farin að vanda valið betur og kaupa veglegri og tímalausa hönnun með árunum.“
Uppáhaldshornið hennar heima er við eldhúseyjuna með góðan kaffibolla og gesti í heimsókn.
Hvaða litir verða vinsælir heima fyrir í vetur?
„Ég myndi segja svartur litur og steingrár í bland við musku bleikan.“
Dagnýju dreymir um nýtt borðstofuborð, stóla og ljós við. „Það er allt í vinnslu og verður vonandi klárt fyrir jólin. Annars er draumahúsgagnið eggið eftir Arne Jacobsen.“