Ef þú elskar hús með sál þá er þetta hús eitthvað fyrir þig. Það stendur við Bergstaðastræti í Reykjavík eða í hjarta miðbæjarins. Búið er að gera húsið upp en þær breytingar sem gerðar hafa verið passa við húsið og eru ekki eins og geimskipi hafi verið komið fyrir á Árbæjarsafni.
Þetta hús er 224 fm að stærð og var það byggt 1912. Húsið er á þremur hæðum og er hver fm nýttur til fulls.
Þegar inn er komið er hlýlegt um að litast. Náttúrusteinn er á gólfum í bland við gamlar gólffjalir. Hvít innrétting er í eldhúsi með fulningahurðum. Allir gluggar eru stífmálaðir hvítir og hurðir sömuleiðis. Heildarmyndin er falleg og heillandi.