Fólk er byrjað að skreyta enda ekki nema fimm vikur í jólin. Jólaskreyting í verslunarkjarna í Bretlandi vakti athygli enda þótti uppstilling á ísbjörnunum sem notaðir voru til þess að skreyta fyrir jólin afar umdeild. Fólk ætti líklega að varast að skreyta á sama hátt heima hjá sér.
Jólahátíðin er tími fjölskyldunnar en ísbjörnunum var stillt þannig upp að þeir litu út fyrir að vera að stunda kynlíf, að minnsta kosti frá ákveðnu sjónarhorni séð. Greinir Mirror frá því að margir hafi furðað sig á uppstillingunni. Reyndar virðist sem ákveðnir einstaklingar hafi haft gaman af útstillingunni.
Verslunarkjarninn baðst afsökunar á útstillingunni eftir að netverjar vöktu athygli á henni. Hefur útstillingunni einnig verið breytt.