Innlit í risastóra einkaþotu Kanye West

Kanye West og Kim Kardashian vilja aðeins það besta. Þau fljúga ekki með neinni venjulegri einkaflugvél en raunveruleikastjarnan og rapparinn virðast ekki vera að hugsa um kolefnissporið sitt. Kardashian sýndi fylgjendum sínum á Instagram hvernig stærstu stjörnur í heimi fljúga. 

Í flugvélinni sem er af gerðinni Boeing 747 eru ekki bara herbergi með lúxussætum heldur líka svefnherbergi eins og sjá má á myndum sem Kardashian setti á Instagram. Óhætt er að segja að flugvélin sé flottari og búi yfir meiri lúxus en heimili margra. Einkaþjálfarinn var með í för þar sem um langt flug var að ræða og nóg pláss til þess að taka æfingu í vélinni. 

Flugvélarnar sem eru á tveimur hæðum geta flogið með hundruð farþega í venjulegu farþegaflugi. Ekki voru svo margir með Kanye West, samstarfsfélögum hans hjá Yeezy og eiginkonu. Segir Kardashian að nú ferðist West eingöngu með svona júmbóþotu.