Það kannast margir við að aukaherbergið á heimilinu endi eins og ruslakompa. Hönnuðurinn Dee Murphy tók sig til og gjörbreytti slíku herbergi á heimili sínu í gestaherbergi og er útkoman dásamleg.
Murphy fékk sex vikur til þess að breyta herberginu og skáp í herberginu. Nú lítur herbergið og skápurinn út eins og það sem má finna á fimm stjörnu hóteli. Þetta sannar það að hvaða herbergi sem er getur endað sem fallegasta herbergi í heimi ef vinna og efni eru lögð í verkið.
Eins og Murphy greindi frá á heimasíðu sinni setti hún kojur í herbergið. Kojurnar eru þó engar venjulegar kojur heldur minna á lítil og krúttleg herbergi þar sem hillur og fín smáatriði eins og veggfóður í loftinu setja svip sinn á vistarverurnar.
Hönnuðurinn hefur einnig verið dugleg að birta myndir af verkefninu á Instagram eins og hér má sjá.