Hús sem hnefaleikakappinn Muhammad Ali bjó í með þriðju eiginkonu sinni, Veronica Porché Ali, er komið á sölu. Þótt Ali hafi flutt úr húsinu 30 árum áður en hann dó árið 2016 gefur húsið og íburðurinn góða mynd af því hvernig einn frægast íþróttamaður sögunnar bjó á níunda áratug síðustu aldar.
Húsið sem er í Los Angeles var byggt árið 1916 og má enn sjá hluta af upprunalegri innanhússhönnuninni í húsinu. Íburðarmiklar súlur, styttur og útskurður setja svip sinn á húsið. Fjölmargar stofur eru í húsinu ásamt bar og níu svefnherbergjum. Einnig er að finna stórt gestahús í garðinum svo ekki hefur væst um gesti hnefaleikakappans.
Samkvæmt Town and Country kostar húsið 17 milljónir Bandaríkjadala eða rúma tvo og hálfan milljarð hvorki meira né minna.