Danska fyrirtækið Vipp er þekkt fyrir ruslafötur sínar, sápuhaldara og klósetthreinsa. Nú er fyrirtækið komið með eldhúsinnréttingalínu sem hægt er að leika sér endalaust með. Yfirhönnuður Vipp, Morten Bo Jensen, býr á Íslandsbryggju í Kaupmannahöfn og er hann að sjálfsögðu með Vipp-eldhúsið á sínu heimili. Hann býr í dásamlegri íbúð ásamt eiginkonu og tvíburadætrum. Heimilið er hægt að skoða í heild sinni HÉR. 

Á hans heimili er eldhúsið í miklu uppáhaldi og segist hann hafa yfirsýn yfir allt sem gerist í íbúðinni þegar hann stendur við eyjuna. Úr eldhúsinu er líka frábært útsýni út á sjó og segist hann njóta þess að virða fyrir sér útsýnið. 

En hvað er svona merkilegt við þetta Vipp-eldhús annað en að vera eitursmart? Jú, innréttingin kemur í tilbúnum einingum. Þar eru eyjur og skápar, hillur og háfur svo eitthvað sé nefnt. Auk þess er hægt að leika sér með veggfestar hillur og að sjálfsögðu væri smart að vera með ruslatunnu í stíl við innréttinguna eins og sýnt er á myndinni. 

Þessi lína frá Vipp er skemmtileg á margan hátt. Hún kemur til dæmis bara í svörtum möttum lit og allar höldur eru eins eða svartar mattar og ílangar. Þeir sem héldu að svört eldhús væru bara bóla þurfa að éta það ofan í sig. Vipp sannar það! 

Það tíðkast kannski ekki á Íslandi að taka innréttingar með sér þegar fólk flytur á milli húsa en í Evrópu og á Norðurlöndunum er það alþekkt. Það réttlætir kannski að kaupa Vipp-eldhús ef þú getur alltaf tekið það með þér á næsta stað og næsta stað því þessar innréttingar eru alls ekki gefins. 

Það sem er forvitnilegt við Vipp-eldhús er að það að hægt að fara með það í ólíkar áttir. Ef veggirnir eru hvítir er það frekar skandinavískt á að líta en um leið og það er sett inn í dökkt rými verður það svolítið eins og svalasta New York-fólkið myndi hafa heima hjá sér. 

 Í þessum Vipp-bæklingi er hægt að skoða alla möguleika á uppröðun.