Rut Káradóttir hannaði heimili Fjólu

„Ég hef verið að mála myndir í gegnum tíðina og eftir nokkurt hlé kom ég með „Landscape“-seríuna mína, sem eru abstrakt, hringlaga myndir málaðar á tré. Einnig er hægt að fá plaggöt með myndlistinni minni,“ segir Fjóla.

Í desember vann hún myndskreytikeppni Krumma en Krumminn eftir hönnuðinn Ingibjörgu Hönnu Bjarnadóttur varð 10 ára á síðasta ári. Fjóla myndskreytti hann og var hann framleiddur í takmörkuðu upplagi sem er löngu uppselt.

„Það allra nýjasta hjá mér er svo ný lína af kertastjökum úr endurunnu járni en þar held ég áfram með hringlaga formið úr myndlistinni minni,“ segir hún en myndirnar eru til sölu í Magnolia á Skólavörðustíg og í HAF store við Geirsgötu.

Þegar Fjóla er spurð út í heimili sitt segist hún hafa fallið fyrir húsinu vegna staðsetningarinnar en það er við Elliðavatn í 110 Reykjavík en fjölskyldan hefur búið í húsinu síðan 2014.

„Húsið er opið og bjart með undurfögru útsýni yfir Elliðavatn. Í húsinu er gott pláss fyrir alla fjölskylduna,“ segir hún.

Það var margt sem heillaði Fjólu við húsið. Fyrst ber að nefna arkitektúr hússins og allir stóru gluggarnir á húsinu sem hleypa birtunni inn. Auk þess er mikil lofthæð í húsinu og stórkostlegt útsýni.

„Okkur fannst staðsetningin góð en úr húsinu er stutt í frábærar gönguleiðir.“

Hjónin fengu Rut Káradóttur, sem er einn þekktasti innanhússarkitekt nútímans, til þess að hanna allar innréttingar í húsið. Innréttingarnar voru svo sérsmíðaðar hjá Smíðaþjónustunni.

Þegar Fjóla er spurð að því hvernig hún vilji hafa í kringum sig segist hún sækjast eftir hlýleika.

„Ég vil hafa heimilið opið og bjart með hlýjum náttúrulegum litatónum. Ég vil hafa þægileg húsgögn og mér finnst skipta máli að blanda saman gömlu og nýju. Blóm prýða hvert heimili og svo vil ég hafa myndlist á veggjunum.“

Hefur þú flutt oft á lífsleiðinni?

„Já, ég myndi segja það. Ég bjó alls 8 ár erlendis, í Danmörku og Þýskalandi, og hef búið í allskyns húsnæði. En ég er virkilega komin heim þar sem ég bý í dag.“

Hvaðan koma húsgögnin?

„Húsgögnin eru samansafn héðan og þaðan. Klassísk hönnun í bland við annað.“

Hvar á heimilinu líður þér best?

„Mér líður best í sófanum í stofunni með góðan kaffibolla og hundinn Gretti kúrandi mér við hlið.“

Hvernig heimilistýpa ert þú? Ertu alltaf að breyta og bæta eða gerir þú hlutina einu sinni og lætur þar við sitja?

„Mér finnst mikilvægt að hafa góðan heilsteyptan grunn á heimilinu. Ég nærist á því að hafa fallegt í kringum mig og mér finnst mjög skemmtilegt að raða hlutum upp á nýtt hjá mér. Þannig öðlast hlutirnir nýtt líf. Gaman er að skipta út púðum og öðrum textíl. Ég tek líka til hliðar og geymi. Það er ótrúlegt hvað hægt er að breyta heimilinu bara með því að raða sömu hlutunum upp á nýtt.“

Hvað drífur þig áfram?

„Samverustundir með fjölskyldunni. Lifa lífinu lifandi.“