„Gróðurinn dregur mann til sín“

Garðurinn hennar Sjafnar er ákaflega fallegur og vel hirtur.
Garðurinn hennar Sjafnar er ákaflega fallegur og vel hirtur.

Garðurinn hennar Sjafnar Hjálmarsdóttur þykir bera af enda mjög vel um hann hugsað. Hún segir samt ekki þurfa að hafa mikið fyrir plöntunum í dag.

Í fallegu og grónu hverfi í Garðabænum hefur Sjöfn Hjálmarsdóttir hlúð samviskusamlega að garðinum sínum í rúma þrjá áratugi. Útkoman er afskaplega gróinn og notalegur garður þar sem hver planta fær að njóta sín, og ekki skrítið að Sjöfn skyldi hljóta sérsaka viðurkenningu frá umhverfisnefnd bæjarins árið 2016 fyrir glæsilegan garð.

Sjöfn og maður hennar Sigurjón byggðu sér einbýlishús á 9. áratugnum í því sem þá var nýtt hverfi austarlega í Garðabæ. Þau fluttu inn árið 1987 og sá Sjöfn strax að það gæti orðið áskorun að gera garðinn fallegan. „Aðalhöfuðverkurinn var að húsið stendur efst í holti og töluverður halli er á vesturhluta lóðarinnar,“ segir hún.

Varð úr að fá Pétur Jónsson landslagsarkitekt til að hanna lóðina og garðyrkjumann til að ganga frá garðinum í megindráttum. „Hvað brekkuna snerti vissum við að þar myndum við vilja hafa viðhaldið sem minnst og byrjaði ég á að setja þar niður pínulítil grenitré og reiknaði ekki með nema að sum þeirra myndu lifa af. En svo héldu trén öll áfram að vaxa og breiða úr sér, og höfum við þurft að grisja brekkuna af og til svo að þau tré sem stæðu eftir hefðu meira vaxtarrými. Nú sér brekkan um sig sjálf að mestu leyti, eins og hugsunin var í upphafi,“ útskýrir Sjöfn.

Fyrri hluta dags nýtur sólar vel við framanvert húsið og sitja þau hjón gjarnan þar og njóta kaffibolla og fuglasöngs. Sunnanvert við húsið hefur svo verið sælureitur fjölskyldunnar í gegnum árin. Á sínum tíma var sett niður röð af öspum til að skapa skjól fyrir annan gróður. Þær voru síðan fjarlægðar þegar þær höfðu þjónað þeim tilgangi og segir Sjöfn að í dag sé hverfið orðið mjög gróið og skjólsælt.

Gróður skapar hlýleika í garðinum á móti hellum og tréverki.
Gróður skapar hlýleika í garðinum á móti hellum og tréverki.

Telur ekki stundirnar sem hún ver í garðinum

Sjöfn segir að í dag þurfi gróðurinn í garðinum ekki svo mikla aðhlynningu. Plönturnar séu orðnar stórar og með góð rótarkerfi svo að vökvun og næringargjöf er nánast orðin óþörf. Þarf Sjöfn aðallega að huga að því að arfi nái ekki að lauma sér inn í garðinn. „Með aldrinum hefur okkur þótt ágætt að hafa garðinn þannig að við komumst vel yfir hann. Annars finnst mér garðyrkjan svo skemmtileg að ég hef ekki verið að spá mikið í því hvað hún tekur mikinn tíma. Ég hef gaman af að vera úti í garði annað slagið eitthvað að rótast í moldinni. Ætli þetta sé ekki eins og hjá þeim sem stunda golf; þeir eru ekki að telja hversu oft þeir eru úti á golfvellinum. Ef maður hefur gaman af þessu þá einfaldlega dregur gróðurinn mann til sín.“

Sjöfn fær garðyrkjumenn til að snyrta runna og klippa greinar eftir þörfum snemma vors. „Á hverju vori sópa ég stéttarnar vandlega, hreinsa á milli hellna og sanda yfir, og felast garðverkin að öðru leyti í einföldu viðhaldi þar sem ég fer út með hrífuna annað slagið og plokka í burtu óboðna gesti,“ segir Sjöfn og svarar að eina „trixið“ sem hún beiti sé að bera kalk á grasflötina af og til svo að mosinn eigi erfiðara með að gróa þar.

Gaman er að segja frá því að í seinni tíð hefur Sigurjón smitast ögn af garðyrkjuáhuga konu sinnar. „Garðurinn hefur eiginlega verið barnið mitt og Sigurjón haft önnur áhugamál, en á seinni árum hefur hann komið meira inn í myndina. Er nú svo komið að hann er hreinlega orðinn mjög duglegur í garðverkunum og mikið gagn að honum,“ segir Sjöfn glettin.

Sjöfn fékk viðurkenningu fyrir fallegasta garðinn.
Sjöfn fékk viðurkenningu fyrir fallegasta garðinn.
Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.890 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »