Friends-leikarinn Matthew Perry hefur sett glæsiíbúð sína í Los Angeles á sölu. Þegar íbúðin fór á sölu í síðustu viku var hún dýrasta íbúðin á fasteignamarkaðnum í Los Angeles að því er fram kemur á vef Page Six. Verðmiðinn er hvorki meira né minna en 35 milljónir Bandaríkjadala eða rúmlega 4,3 milljarðar íslenskra króna.
Hvað fær fólk svo fyrir svona rándýra íbúð sem kölluð er „höfðingjasetur í háloftunum“ af fasteignasölum?
Íbúðin er nýuppgerð og er á fertugustu og efstu hæð svo útsýnið er mjög gott. Ekki nema fjögur svefnherbergi eru í íbúðinni en átta baðherbergi eru til staðar svo enginn þarf að bíða í röð til þess að komast á klósettið en inni í íbúðinni er meðal annars bíósalur. Útisvæðið er veglegt þrátt fyrir að íbúðin sé hátt uppi en fjögur útisvæði fylgja íbúðinni.
Er Perry sagður vera að selja íbúðina þar sem hann dvelur nú meira í New York.