Listakonan Aðalheiður S. Eysteinsdóttir er mörgum kunn fyrir listaverk sem prýða ýmsa staði á Íslandi. Einkum eru verk hennar áberandi á Norðurlandi en hún starfar við list sína bæði á Akureyri og á Siglufirði. Tilbrigðasterkir karakterar eftir Aðalheiði prýða til dæmis hótel á höfuðborgarsvæðinu en það getur þó verið erfitt að nálgast verk hennar sunnan megin á landinu.
Rammagerðin hefur ákveðið að bjóða höfuðborgarbúum að kynnast þessum frábæra listamanni og hefur Aðalheiður lagt áherslu á jólaköttinn sem margir Íslendingar þekkja. Rammagerðin hefur ætíð verið þekkt fyrir að gera jólunum hátt undir höfði og eru margir sem muna eftir gömlu jólasveinunum sem hreyfðu sig ævintýralega hérna fyrir margt löngu. Núna eru bæði jólakettir Aðalheiðar og gömlu jólasveinarnir mættir í glugga Rammagerðarinnar þar sem bæði tengjast menningu okkar og arfleifð og eru allir velkomnir til að berja herlegheitin augum.