Iðnhönnuðurinn Sigga Heimis er hætt að vinna fyrir sænska móðurskipið IKEA eftir rúmlega 20 ára starf hjá fyrirtækinu. Strax eftir áramót hefur hún störf hjá íslenska fyrirtækinu Marel.
„Ég er með ódrepandi og brennandi áhuga á nýsköpun og vöruþróun og Marel er á vegferð sem er ótrúlega spennandi. Starfið sem ég mun taka við heitir Platform & strategy director og ég mun vinna með að samhæfa vöruþróun innan fyrirtækisins sem fer fram á mörgum stöðum í heiminum,“ segir Sigga í samtali við Smartland.
Þótt Sigga hafi unnið hjá IKEA í meira en tvö árautgi þá hefur hún líka sinnt eigin hönnunarverkefnum og tíma var hún hönnunarstjóri hjá Fritz Hansen í Danmörku sem framleiðir húsgögn Arne Jacobsen. Þegar Sigga er spurð að því hvort hún muni ekki sakna IKEA segir hún að það sé mikilvægt að hrista upp í hlutunum reglulega. Og þetta hafi verið réttur tímapunktur.
„Ég byrjaði hjá IKEA 1998 og er búin að fylgja því fyrirtæki síðan. IKEA hefur á þeim tíma rúmlega þrefaldast og sá tími fannst mér algjörlega frábær. Nú langar mig að helga mig nýsköpun á sviði sem getur haft áhrif á mikilvæga heimsþróun. Marel er þar fremst í flokki hvað varðar jákvæðar breytingar þar á mikilvægu sviði, mat,“ segir hún.