Við Ránargötu í Reykjavík hefur fjölskylda komið sér vel fyrir. Íbúðin er einstaklega falleg og vel heppnuð eins og sést á myndunum. Um er að ræða 109,8 fm íbúð sem stendur í húsi sem byggt var 1925. Íbúðin er á tveimur hæðum.
Í íbúðinni eru upprunaleg viðargólf sem búið er að pússa upp. Þau setja svo sannarlega svip sinn á rýmið en meðfram gólfinu eru fallegir gólflistar sem eru lakkaðir hvítir. Í íbúðinni eru einnig þykkir og fallegir loftlistar.
Íbúðin er vel skipulögð og þær breytingar sem hafa verið gerðar á íbúðinni eru í takt við þann anda sem ríkti þegar húsið var byggt.
Í stofunni er vandaður og góður flauelssófi og skemill og eru veggir málaðir í mjúkum ljósgrábrúnum tón. Stofa og borðstofa renna saman í eitt en inn af borðstofu er eldhús en úr eldhúsinu er gengið niður í kjallara.