Liv Bergþórsdóttir, fyrrverandi stjórnarformaður WOW air, festi kaup á einu dýrasta húsi landsins 2017. Nú er hún búin að afsala sér hlutnum í húsinu.
Liv Bergþórsdóttir og Sverrir Viðar Hauksson festu kaup á fasteigninni við Blikanes 20 2017 og borguðu 230 milljónir fyrir húsið. Hún átti 50% hlut og hann 50% hlut. Þann 16. október síðastliðinn, eða skömmu áður en stjórn WOW air var stefnt vegna skuldafjárútboðs, eignaðist Sverrir Viðar húsið að fullu. Í afsali kemur fram að umsamið kaupverð sé að fullu greitt en ekki kemur fram í afsali hver upphæðin var.
Húsið, sem teiknað er af Pálmari Kristmundssyni arkitekt, þykir vera eitt glæsilegasta hús landsins en í húsinu eru tvö eldhús. Annað eldhúsið er í opnu rými ásamt stofu og borðstofu en hitt eldhúsið er á neðri hæðinni og er ætlað fyrir þjónustufólk. Árið 2005 var fjallað um húsið í Fréttablaðinu og tekið viðtal við þáverandi eiganda hússins. Ekkert var til sparað þegar húsið var byggt og mikið lagt í innréttingar, gólfefni, klæðningu utan á húsinu, bílaplan og hljóðvist innanhúss.