Baðherbergi í húsi nokkru var tekið í gegn og er allt annar blær yfir hönnuninni en við eigum að venjast. Smáar ílangar flísar í sundlaugarlit setja svip á rýmið.
Baðherbergið var hannað af Luigi Rosselli Architects og Alwill Interiors og er útkoman einstök. Þessi samvinna kallar fram ró og frið. Þessi ljósblái litur minnir á sundlaugar landsins en þó er eitthvert hátíðlegt yfirbragð.
Baðherbergi þetta er á heimili nokkru í Ástralíu. Ljósbláu flísarnar minna svolítið á mósaíkflísarnar sem voru svo vinsælar í kringum 1995 en líka á áttunda áratuginn þegar enginn var alvörumanneskja nema státa af ílöngum flísum á heimili sínu.
Til þess að færa áttunda áratuginn til nútímans eru dökk blöndunartæki notuð yfir vaska og baðkar. Og svo eru tveir speglaskápar sem skapa ákveðna speglun sem er heillandi.
Punkturinn yfir i-ið er svo viðarskápurinn, sem er upp á tíu. Það hefði verið galið að fara í frekari gólfflísar við bláu veggflísarnar og því er gólfið svolítið eins og það hafi bara verið flotað. Ef þú ert að leita að baðflísum og langar ekki í gráar 80X80-flísar þá ættirðu að skoða þennan stíl nánar.