Bleiki liturinn hefur verið alls ráðandi í hönnunarheiminum undanfarið. Sjá má fölbleikan lit á tískupöllunum og í innréttingum hvers konar. Athygli vekur hversu hlutlaus bleiki liturinn getur verið. Hann gengur vel við flesta liti og setur hlýlegan en látlausan tón á flesta hönnun. Hér má sjá dæmi þess hvernig nota megi bleika litinn á heimilum.
Baðherbergið verður ögn hlýlegra með hjálp bleika litsins. Hægt er að ganga alla leið og hafa alla veggi bleika eða þá velja einn hlut sem fangar athyglina eins og til dæmis baðkar. Grænar plöntur passa líka einstaklega vel við bleika litinn og setja punktinn yfir i-ið. Búi maður svo vel að eiga frístandandi baðkar þá er hægt að mála neðri helming baðkarsins með fagurbleikum lit. Þá er hægt að mála loftið bleikt eða bæta við bleikum handklæðum.
Bleiki liturinn fer líka ákaflega vel inni í eldhúsi. Bleikir eldhússkápar við hvíta borðplötu og gyllt blöndunartæki er til dæmis mjög skemmtileg blanda. Þá passar bleiki liturinn einnig vel við ýmsa viðartóna. Það hefur verið mjög vinsælt að láta filma eldhússkápa í stað þess að skipta þeim út í heilu lagi. Þá er lítið mál að skipta um höldur og blöndunartæki. Með þeim hætti er auðveldara að breyta litaskema eldhússins með frekar litlum tilkostnaði.
Það þarf að vanda sig þegar kemur að bleika litnum inni í svefnherbergi. Hann má ekki vera of yfirþyrmandi né of væminn. Hægt er að bæta við nokkrum bleikum púðum í bland við aðra brúna eða gráa tóna. Minna er meira í þessu tilviki.
Stofan getur vel borið bleika veggi. Bleiki liturinn virðist ganga við flesta liti og því ættu húsgögnin ekki að setja strik í reikninginn þó veggirnir verði bleikir. Grænn flauelissófi og margar grænar plöntur fara vel við bleiku veggina. Hafi maður ekki smekk fyrir bleikum veggjum er hægt að velja frekar bleik húsgögn eins og til dæmis sófa eða stóla við dekkri veggi.
Það er hægt að skapa suðræna stemmingu með því að mála svalirnar bleikar eða garðhúsgögnin. Þá getur einn veggur verið nóg til þess að ramma inn fallega uppstilltar útiplöntur.