Ofurfyrirsætan Gigi Hadid birti myndir úr uppgerðri íbúð sinni í New York-borg á Instagram á dögunum. Hadid greinir frá því að hún hafi nýverið gert íbúðina upp með hjálp skapandi fólks. Hún hefur þó lítið verið í íbúðinni eftir að framkvæmdirnar kláruðust vegna kórónuveirufaraldursins en er þó spennt fyrir að verja meiri tíma þar.
Íbúðin er afar litrík þrátt fyrir að flestir veggir séu hvítir á lit. Í stað þess að mála veggina í lit notar hún húsgögn og listaverk til þess að gefa íbúðinni lit.
Hadid er meðal annars með teppi á stiga hjá sér sem minnir einna helst á listaverk en þegar gengið er niður stigann blasir við stórt listaverk sem tónar vel við.
Við áberandi marmarann á baðherberginu er búið að veggfóðra með gömlum og litríkum forsíðum tímaritsins The New Yorker.