Fjölmiðlakonan Helga Arnardóttir og leikstjórinn Bragi Þór Hinriksson hafa sett íbúð sína í Drápuhlíð í Reykjavík á sölu. Helga kveður heimilið sitt í Hlíðunum og segir að ýmislegt hafi orðið að veruleika í þessari íbúð.
„Fyrsta heimilið okkar Braga þar sem tvær sjónvarpsseríur af Lifum lengur urðu til, á annan tug hlaðvarpa fór í loftið, barnabókin Nína Óskastjarna var skrifuð, kvikmyndahandritið að Birtu, myndinni okkar var skrifað og varð að mynd undir leikstjórn Braga og síðast en ekki síst þar sem Jakob Örn augasteinninn okkar kom í heiminn. Þetta má alveg kalla góð afköst. En fyrst og fremst höfum við átt yndislegt heimili í góðu hverfi sem hefur haldið vel utan um fjölskylduna og látið okkur líða vel í allri þessari sköpunarvinnu,“ skrifar Helga í færslu á Facebook.
Íbúðin er 114 fermetrar að stærð og í henni eru fjögur svefnherbergi. Stofan er björt og falleg með fallegum bláum sófa sem setur stemninguna. Á veggjunum eru einstaklega töff listaverk sem tóna vel við aðra innanstokksmuni.
Eldhúsið er einstaklega töff með flotuðu gólfi og hvítum flísum á veggjunum. Viðarhillur og borðplötur gefa því hlýtt yfirbragð.