One Direction-stjarna selur höllina í Calabasas

Breski tónlistarmaðurinn Liam Payne hefur selt 900 fermetra höll sína í Calabasas í Bandaríkjunum. Höllin fór á 10,2 milljónir bandaríkjadala eða um 1,3 milljarða íslenskra króna.

Payne keypti húsið fyrst árið 2015 og setti það á sölu árið 2018. Ásett verð var þá 14 milljónir bandaríkjadala en húsið seldist ekki fyrr en hann var búinn að lækka það niður í 10,2. 

Húsið stendur í hæðunum fyrir ofan Malibu og er þar að finna fossa, tjarnir og stórkostlegan garð. Í húsinu er líka sundlaug, líkamsrækt, vínkjallari og bókaherbergi á tveimur hæðum. 

Fimm svefnherbergi eru í húsinu og sex baðherbergi. Þar er líka að finna hljóðver, gestahús og hugleiðsluhús. 

Los Angeles Times