Við Ásaþing í Kópavogi stendur afar vandað og vel heppnað 257 fm endaraðhús byggt árið 2011. Húsið er hannað af Björgvini Snæbjörnssyni arkitekt hjá Apparat. Hann hannaði einnig innréttingar hússins sem setur heildarmynd þess upp á annað plan. Eftir Björgvin liggja mörg vel heppnuð hús eins og Icelandair hótel Mývatn. 

Eldhús og stofa eru í sama rými og prýða fallegar innréttingar eldhúsið. Þar er að finna sérsmíðaðar viðarinnréttingar, dökkbæsaðar, með marmaraborðplötu. Eyjan í eldhúsinu er mjög stór eða um þrír og hálfur metri á lengd. Dýptin er 130 cm. Það er því hægt að halda fín matarboð í húsinu enda nóg pláss til alls. 

Hlýlegt er um að litast í húsinu og er pláss fyrir stórt borðstofuborð og svo tengist sjónvarpsrými borðstofunni. 

Sterk heildarmynd er á húsinu og eru baðinnréttingar og fataskápar í takt við innréttingar í eldhúsinu og í stofu eru innbyggðar bókahillur sem setja svip á rýmið. 

Af fasteignavef mbl.is: Ásaþing 10