Við Skólagerði í Kópavogi stendur 204 fm raðhús sem byggt var 1964. Húsið hefur ekki fengið mikla ást og umhyggju í gegnum tíðina og þarfnast því mjög stórs skammts af hvoru tveggja enda var eigandinn upptekinn við annað í lífinu.
Ásett verð er 38,5 milljónir, sem er svipað verð og á blokkaríbúð, en nýr eigandi þyrfti að fara í mjög miklar endurbætur sem kosta peninga. Á fasteignavef mbl.is kemur fram að fyrir liggi skýrsla vegna ástandsskoðunar hússins.
Húsið er dánarbú Carls Johans Eiríkssonar sem gerði garðinn frægan sem ein besta riffilskytta landsins á sínum tíma en hann var 91 árs þegar hann kvaddi síðasta sumar. Hann átti Íslandsmet í fjölmörgum skotgreinum og vann fjölda Íslandsmeistaratitla. 1992 keppti hann fyrir Íslands hönd á Ólympíuleikunum í Barcelona í riffilgreininni 60 skot liggjandi.