Heimili lögmannsins Karls Georgs Sigurbjörnssonar er komið á sölu. Um er að ræða 285 fm einbýli sem byggt var árið 2000. Stíllinn á húsinu er höfðinglegur en fyrir framan útihurðina er bogadregið innskot sem setur svip á heildarmyndina.
Karl Georg er með lögheimili í húsinu ásamt eiginkonu sinni, Ilona Sigurbjörnsson, en húsið er skráð á félagið J-4 ehf. Félagið J-4 festi kaup á húsinu 19. ágúst 2019. Ilona er skráð fyrir félaginu ásamt tengdaföður sínum og föður Karls Georgs, Sigurbirni Viðari Eggertssyni.
Húsið er glæsilegt í alla staði með steyptu bílaplani og miklum skjólveggjum í kringum húsið. Í garðinum er stór verönd með heitum potti.