Helga Margrét Gunnarsdóttir og Kjartan Páll Sæmundsson búa í fallegri íbúð í Kópavogi sem þau hönnuðu og gerðu upp saman. Þau ákváðu að láta eldhúsið verða miðpunkt heimilisins enda veit hún fátt skemmtilegra en að prófa sig áfram þegar kemur að hollustu.
Helga Margrét æfir mikið og hefur fundið það af eigin raun hvað næring skiptir miklu máli fyrir æfingar og í lífinu öllu. Hún deilir með fólki á Instagram-síðunni sinni „helgamagga“ hugmyndum að hollri næringu og hefur það að markmiði að hvetja fólkið í kringum sig áfram.
Hvað getur þú sagt mér um heimilið þitt?
„Við keyptum þessa íbúð haustið 2019 og sáum mjög mikil tækifæri í eigninni og ákváðum strax að taka hana alla í gegn. Eldhúsið var í litlu herbergi í enda íbúðarinnar og þar við hliðina voru tvær samliggjandi stórar stofur. Það lá því beinast við að færa eldhúsið yfir í aðra stofuna og opna á milli yfir í hina stofuna. Eldhúsið er núna algjörlega hjartað í íbúðinni og svo fengum við með þessu auka svefnherbergi sem veitir ekki af með þrjú börn á heimilinu.
Baðherbergið var einnig góð áskorun en það var virkilega áhugavert í útliti svo ekki sé meira sagt. Það eru myndir af því eins og það var á Instagram-síðunni minni en þar voru þrjár mismunandi litasamsetningar af marmara samankomnar. Það tók um fjóra daga að brjóta baðherbergið allt niður áður en við gátum hafist handa við að byggja það upp aftur.
Við vorum virkilega heppin að ná að krækja í þessa eign og líður okkur dásamlega vel hér.“
Hvað getur þú sagt mér um eldhúsið þitt?
„Ég og maðurinn minn hönnuðum eldhúsið í sameiningu. Við vorum með stórt rými og vildum hafa stóra eyju og mikið skápapláss. Við vorum bara bundin af því hvar vaskurinn gæti verið þar sem við vorum að færa lagnir yfir vegginn svo það var upphafspunkturinn. Restin var svo ákveðin út frá staðsetningunni á vaskinum og uppþvottavélinni. Maðurinn minn teiknaði þetta allt upp en hann er einstaklega handlaginn og góður í öllu svona. Krakkarnir elska að sitja við eyjuna og svo finnst mér líka frábært að hafa eldhúsið stórt og opið og sjá vel yfir í stofuna. Það er einnig gaman að hafa eldhúsið opið ef við erum með gesti í mat.“
Hvaðan eru innréttingarnar í eldhúsinu?
„Innréttingin er frá IKEA. Þegar við vorum búin að fá helminginn afhentan fengum við þær upplýsingar að innréttingin væri hætt í framleiðslu og óvíst hvort við myndum fá restina af framhliðunum sem vantaði. Þetta var í miðri fyrstu bylgju kórónuveirunnar og enginn vissi neitt þar sem var farið að hægja á öllum sendingum. Þetta leystist þó sem betur fer allt á endanum en tók sennilega fimm sinnum lengri tíma að fá allt afhent en við höfðum gert ráð fyrir. Það er ekki svo langt síðan við fengum síðustu skápaframhliðarnar og eigum því enn eftir að láta sérsmíða fyrir okkur búrskáp sem mun loka af hornið þar sem hrærivélin og blandarinn eru núna. En góðir hlutir gerast hægt, var ekki einhver sem sagði það?“
Aðspurð um stílinn á heimilinu segir hún hún vilji hafa hlýlegt í kringum sig. „Heimilið þitt þarf að vera þannig að þér líði vel þar öllum stundum. Við fengum Erlu Heimis í Lýsingu og hönnun til að aðstoða okkur við lýsinguna á heimilinu. Við tókum niður loftið í eldhúsinu. Erla teiknaði upp fyrir okkur lýsinguna þar og gaf ráðleggingar varðandi restina af heimilinu. Lýsing skiptir svo miklu máli sérstaklega hér á landi á veturna. Erla sagði okkur til dæmis að börn leika sér mun meira í herbergjunum sínum ef lýsingin er góð.“
Hver er uppáhaldsmaturinn þinn?
„Pizza! Við fjölskyldan erum alltaf með heimabakaða pizzu á föstudögum. Nýlega erum við farin að baka súrdeigspizzur úr okkar eigin súr. Það er heilmikil stemning í kringum þetta hjá okkur og alltaf eitthvað nýtt álegg prófað vikulega á eina pizzu. Við sitjum vanalega við eyjuna og pizzurnar eru borðaðar um leið og þær koma úr ofninum.“