„Loksins komin í draumahúsið mitt“

Hafdís Svavarsdóttir er alsæl með draumahúsið sitt.
Hafdís Svavarsdóttir er alsæl með draumahúsið sitt. mbl.is/Eggert Jóhannesson

Hafdís Svavarsdóttir , viðskiptafræðingur og meistaranemi á Bifröst, og Emil Hilmarsson tölvunarfræðingur keyptu sér nýverið draumahúsið og gerðu það upp saman ásamt börnum sínum. Þau notuðu tækifærið þar sem kórónuveiran var í hámarki og ekki hægt að ferðast. 

Hafdís og Emil eiga þrjú uppkomin börn saman. Þau vildu festa kaup á eign sem væri rúmgóð, jafnvel þannig að hægt væri að útbúa litla íbúð í fyrir einn son þeirra og tengdadóttur.

„Við fjölskyldan erum ánægð með húsið og heldur það vel utan um allar þarfir okkar heimilisfólksins. Það er góður andi í húsinu og var vandað til verka þótt við gerðum hlutina sjálf. Húsið var frekar gamaldags og ég sagði við manninn minn að ef við færum í þessi kaup þá þyrftum við að breyta heilmiklu og við gerðum það.“

Það var ekki í boði að ferðast á þeim tíma sem húsið var keypt og lítið um mannamót svo fjölskyldan hafði góðan tíma til að einbeita sér að verkefninu.

„Við gripum tækifærið þegar engar utanlandsferðir voru í boði vegna kórónuveirunnar. Í raun á ég ekki heiðurinn af framkvæmdunum heima heldur maðurinn minn, Nadía Ýr Emilsdóttir, dóttir okkar, og Leó Snær Emilsson, sonur okkar.“

Hvað heillaði þig við húsið?

„Það sem heillaði mig var hvað það er rúmgott og fallegt, eða öllu heldur bauð upp á mikla fegurð eftir endurbætur. Í húsinu voru aukaherbergi á neðri hæðinni sem hægt var að breyta í aukaíbúð fyrir son okkar. Við fórum í fallega framkvæmd þar. Svo í dag má segja að ég sé loksins komin í draumahúsið mitt.“

Hvað ráðleggur þú fólki sem á sér draumahús en finnst flókið að fara af stað og breyta og bæta heima hjá sér?

„Það þarf að skoða vel í kringum sig eins og við gerðum.

Ég sá strax þegar ég kom inn í húsið að mig langaði að skipta út eldhúsinu og mála loftið hvítt.

Svo vildi ég skipta um gólfefni líka. Þessar breytingar voru vel fjárfestingarinnar virði. Við keyptum parketið í Harðviðarvali.“

Handlagin fjölskylda sem vinnur vel saman

Hver er uppáhaldsstaðurinn þinn heima?

„Ég verð að segja eldhúsið. Það er einstaklega fallegt og gott að vinna í því. Við völdum innréttingar í eldhúsið í IKEA en ég hafði áður verið með eldhús þaðan og var mjög ánægð með það líka.“

Hafdísi finnst mikilvægt að hafa í huga smekk og þarfir allra sem á heimilinu búa þegar hús eru gerð upp.

„Fjölskyldan var dugleg í framkvæmdunum meðan á breytingunum stóð. Við keyptum húsið 9. september árið 2020 og vorum flutt inn 12. desember sama ár. Það var dásamlegt að verja jólunum í nýuppgerðu húsi og mæli ég með fyrir alla að fara í breytingar af þessum toga þannig að allir sem búa á heimilinu noti sína verkhæfni svo draumurinn verði að veruleika.“

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.990 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »