Tónlistarkonan Adele festi nýverið kaup á sinni þriðju fasteign í Beverly Hills-hverfi í Los Angelesborg í Bandaríkjunum. Kaupverð eignarinnar var 10 milljónir bandaríkjadala.
Húsið er 512 fermetrar að stærð og í því eru fjögur svefnherbergi og fjögur baðherbergi. Fimm ár eru síðan Adele keypti sína fyrstu fasteign í hverfinu á 9,5 milljónir bandaríkjadala. Aðra eignina keypti hún árið 2019 fyrir 10,6 milljónir, skömmu eftir að hún skildi við eiginmann sinn Simon Konecki.
Húsið sem hún keypti árið 2019 er við hlið fyrsta hússins. Telja fjölmiðlar vestanhafs að Konecki búi í húsi númer tvö.
Adele er ein tekjuhæsta söngkona í heiminum í dag. Nú á hún fasteignir í Beverly Hills að verðmæti yfir 30 milljónir bandaríkjadala eða um 3,7 milljarðar íslenskra króna. Þrátt fyrir það er tónlistarkonan eins og við hin, elskar góð tilboð, en hún sást á útsölumarkaði í Los Angeles um síðustu helgi.