Draumurinn um sérbýli er sterkur hjá landanum og líka draumar um að búa í 101 Reykjavík. Hér getur þú sameinað þetta tvennt með því að festa kaup á einu minnsta og ódýrasta parhúsi landsins sem stendur við Óðinsgötu 18. Húsið kostar 40,9 milljónir.
Um er að ræða 51 fm parhús sem byggt var 1924. Húsið þarfnast svolítillar ástar og því væri ekki úr vegi að húsið kæmist í hendur á fólki sem kynni að meta það. Húsið stendur við Óðinsgötu en er bakhús þannig að ónæði frá umferð er sáralítið.
Í eldhúsinu er hvít innrétting með svörtum höldum. Parket er á gólfum og hefur baðherbergi verið endurnýjað nýlega. Eins og sjá má á myndunum gæti þetta verið eitthvað fyrir þá sem vilja lifa drauminn sinn.