350 milljóna Bakkavararhöll

Ljósmynd/Gunnar Örn

Kjartan Sveinsson teiknaði þessa 500 fm höll sem stendur á besta stað á Seltjarnarnesi. Húsið var byggt 1990 og var ekkert til sparað þegar það var byggt. Í húsinu eru 11 herbergi og því ætti ekki að fara illa um næstu eigendur. 

Stíll Kjartans Sveinssonar var sérlega vinsæll hérlendis fyrir um 30 árum en hann teiknaði mörg hús í Arnarnesinu í Garðabæ. Hann teiknaði til dæmis húsið sem Lilja Hrönn Hauksdóttir kaupmaður í Cosmo er að selja svo einhver séu nefnd. 

Að innan er húsið við Bakkavör sérlega glæsilegt en fyrir utan húsið er risastórt hellulagt bílastæði. Súlur og bogadregnar línur fá að njóta sín við anddyri hússins og eru gluggarnir í frönskum stíl. 

Þegar inn er komið tekur glæsileikinn við. Hringstigi upp á aðra hæð minnir á stigann á Southfork í Dallas þar sem JR og Bobby Ewing fengu fimm stjörnu uppeldi hjá Miss Elly. Þótt stiginn sé teppalagður þá eru flest gólf parketlögð með fiskibeinamunstri sem fer vel við húsgögnin. 

Af fasteignavef mbl.is: Bakkavör 12

Ljósmynd/Gunnar Örn
Ljósmynd/Gunnar Örn
Ljósmynd/Gunnar Örn
mbl.is