Tanntæknirinn Kristín Þóra Jónsdóttir hefur sett einbýlishús sitt við Miðstræti á sölu. Þetta er ekki í fyrsta skipti sem húsið er til umfjöllunar á Smartlandi því það var áður í eigu Birtu Björnsdóttur hönnuðar og Jóns Páls listamanns. Þau seldu húsið þegar þau fluttu búferlum til Spánar.
Húsið hefur tekið nokkrum breytingum eftir að Kristín Þóra festi kaup á því. Hún hefur næmt auga fyrir hreinum línum og hefur náð að sameina gamlan og nútímalegan stíl á sjarmerandi hátt. Húsið var byggt 1909 og býr yfir ríkulegri sögu. Það er 130 fm að stærð og er á þremur hæðum.
Á miðhæðinni er inngangur, eldhús, stofa og borðstofa. Úr þessu rými er hægt að labba út í garð og loftar vel á milli rýma. Á efstu hæðinni eru svefnherbergi og baðherbergi en í kjallaranum er herbergi ásamt baðherbergi.
Gólfin í húsinu eru lökkuð svört en flest allt annað er hvítmálað eins og veggir, gluggar, gólflistar og innihurðir. Stíllinn á heimilinu er smart og skemmtilegur.